sulitaria, penzarosa, ricamanno 'a vesta 'e sposa
Eugene de Blaas, The love letter
So’ ddieci’ anne
So’ dieci’ anne, e, penzarosa,
tu ricame ’a veste ’e sposa:
so’ dieci’ anne ca te spiego
ca pe’ me nce vo’ n’impiego...
So’ dieci’ anne... E tu m’aspiette
tutt’ ’e ssere, ’npunto ’e sette,
for’ ’a ll’asteco, affacciata...
Saglie ’o sisco ’a miezo ’a strata,
cade ’a ll’asteco na rosa
cu na lettera attaccata.
Dice ’a lettera: « Mio amore,
sii costante nella vita,
ché il mio cuore è nel tuo cuore...
Margherita ».
So’ dieci’ anne... E dint’ ’a strata
cchiù ’e na cosa s’è cagnata...
Geretiello ’o canteniere
s’è vestuto ’a berzagliere,
Furtunata ’a sfurtunata
ll’ata sera s’è spusata
dint’ ’a cchiesia a bintun’ore...
Margarì, prega ’o Signore
ca nce desse fede e forza
pe’ ’sta vita e pe’ ’st’ammore...
Quanta suppliche aggio scritto,
refunnenno carta e ’gnosto.
Tutt’ ’e juorne: « Il sottoscritto
chiede un posto ».
So’ dieci’ anne, ma a’ stess’ora,
Margarì, m’aspiette ancora...
sulitaria, penzarosa,
ricamanno ’a veste ’e sposa...
« Nonna nonna nunnarella... »
cchiù ’e na connola nuvella
tu te guarde tristamente...
E na lacrema cucente
cade ncopp’ ’a veste ’e sposa
ca, stracquata, tiene mente.
Ma a’ stess’ora, ’a stessa rosa
porta ’a lettera attaccata,
condicendo: « La tua sposa
sta malata! »
- Libero Bovio
Libero Bovio (Napoli, 8 giugno 1883 – Napoli, 26 maggio 1942) è stato un poeta, scrittore, drammaturgo, giornalista italiano, autore di testi di molte celebri canzoni in lingua napoletana. Insieme a Salvatore Di Giacomo, Ernesto Murolo ed E. A. Mario è stato un artefice della cosiddetta epoca d'oro della canzone napoletana.
Eugenio De Blaas, noto anche come Eugene von Blaas o Eugene de Blaas (Albano Laziale, 24 luglio 1843 – Venezia, 1931), è stato un pittore italiano naturalizzato austriaco.
